Бүгін ҚР Тұңғыш Президенті Музейінде «Ғасырлар аманаты» республикалық акциясы аясында «Аманат» сандығын тапсыру рәсімі өтті, деп хабарлайды BNews.kz.

Музейге тапсырылған «Аманат» сандығында еліміздегі бірқатар музейдің қорындағы жәдігерлердің фотосуреттері мен сипаттамалары жинақталған. Атап айтқанда, XVII-XVIII ғасырдағы батыр сауыты, Ілияс Есенберлиннің қолжазбасы, Абылай хан тағы, Бөгенбай батырдың дулығасы, Ақан серінің адалбақаны тәрізді жәдігерлер туралы мәліметтер топтастырылған.
Сонымен қатар, Алматы облысынан табылған айбалта мен Ақтөбе облыстық музейінің қорындағы Бұжыр батырдың сауыты, Атырау музейінен алынған қайрақ тас пен Жамбыл облысынан табылған сақ дәуіріндегі батыр дулығасы туралы қызықты мәліметтер енгізілген.

«Аманат» сандығын ҚР Тұңғыш Президенті Музейінің директоры Алма Сағынғалиқызына Ақмола облыстық мәдениет басқармасының бастығы Сәуле Бөкейханқызы салтанатты түрде тапсырды.

Айта өтейік, бүгін ҚР Тұңғыш Президенті Музейінде «Ғасырлар аманаты» республикалық акциясының қорытындысы жарияланды. Шара барысында Қазақ хандығының 550 жылдығына арналған деректі фильмдер көрсетіліп, көпшілік қауымға арнайы көрме ұсынылды.

Мәскеуде Орыс география қоғамының (ОГҚ) штаб пәтерінде Жарылқап Бейсенбайұлының «Шоқан Уәлиханов» кітабының тұсаукесер рәсімі өтті. Бұл туралы Қазақстанның Ресейдегі елшілігінің баспасөз қызметі мәлімдеді, деп хабарлайды BNews.kz.

Кітап атақты қазақ ғалымының 180 жылдығы мен ОГҚ-ның 170 жылдығына орайластырылды.

Еңбек ҚР Мәдениет және спорт министрлігі мен Қазақстанның Ресейдегі елшілігінің көмегімен орыс тілінде жарық көрді. Жаңа тарихи, архивтік құжаттармен толықтырылған кітапта Шоқан Уәлихановтың өмірі мен оның дәуірі жайлы белгілі фактілерге қатысты маңызды қорытындылар жасалады.

Іс-шараны ашқан Орыс география қоғамы атқарушы директорының орынбасары Илья Гуров ОГҚ қазақстандық әріптестерімен бірге көптеген жобаларды жүзеге асырып жатқанын айтты.

«Шоқан Уәлихановтың қайталанбас өмір жолы – азаматтық ерліктің жарқын үлгісі. Ол Орыс география қоғамының мүшесі деген атаққа әбден лайық болды. Өмірден тым ерте кеткені өте өкінішті», – деді И.Гуров.

Тақырып:bnews.kz

«Ұлы дала елi» ұғымы брендке айналды. Бұл туралы Астанада ҚР Президентi жанындағы мемлекеттiк басқару академиясында өтiп жатқан Қазақстан халқы Ассамблеясы Ғылыми-сарапшылық кеңесiнiң кеңейтiлген отырысында ҚХА Төрағасының орынбасары, ҚР ПӘ хатшылық меңгерушiсi Ералы Тоғжанов мәлiмдедi, деп хабарлайды Bnews.kz тiлшiсi.

«Ұлы дала елi» ұғымын бренд деуге болады. Бұл – жаңа идея. Бiр айға созылған «Ұлы дала елi» экспедициясы жайлы естiген шығарсыздар. Елiмiздiң бiрнеше облысын аралаған экспедицияның қорытындысы өте қызықты, нәтижелi болды. Бiз осы ғылыми экспедицияның қорытындысы бойынша ғылыми конференция өткiздiк. Сол кезде бiздiң конференциямыз үш сағатқа созылып кеттi, өйткенi қызықты болғаны соншалық, ешкiм бiздi жiбергiсi келмедi», – дедi Ералы Тоғжанов.

Атап өтсек, Қазақ хандығының 550 жылдығына арналған «Ұлы дала елi» тарихи-мәдени экспедициясы 4 бағытта ел аралап, 20 мың шақырымнан астам қашықтықты бағындырды. Таразда экспедиция қорытындысы бойынша «Ұлы дала тарихы» көрмесi мен конференция ұйымдастырылды. Қазiр экспедиция бойынша материалдар жинақталып, жүйеленуде.

Тақырып: bnews.kz

Ұлттық жоба ретінде түсіріліп жатқан «Қазақ елі» киносын түсіру бүгінгі таңда өз деңгейінде, ешбір қиындықсыз жүргізіліп жатыр. Бүгінгі таңда 250-300-ге жуық маманымыз түсіру алаңдарында жұмыс істейді. Мұны ҚР Президенті жанындағы орталық коммуникациялар қызметінде өткен брифингте Қазақстанның еңбек сіңірген қайраткері Арман Әсенов мәлім етті, деп хабарлайды Bnews.kz.

«Жалпы, тұтас он сериал бойынша 150 сахналық қойылым түсірілуі керек болса, бүгінгі күні оның 70-ке жуығы толық түсіріліп бітті. Ал қазіргі кезде түсіру алаңында 250-300-ге жуық маманымыз өз міндеттерін алаңсыз атқарып жатыр. Тіпті, ауа-райының жағдайын мүмкіндігінше өз игілігімізге жарата отырып, түсіру процесін тоқтатқанымыз жоқ», – дейді Арман Тұрсынбайұлы.

Айта кетейік, Мемлекет басшысының Жарлығымен биыл елімізде Қазақ хандығының 550 жылдығы деп жарияланып, ол мемлекеттік деңгейде аталып өткен болатын. Осыған орай, ел бюджетінен қомақты қаражат бөлініп «Қазақ Елі» деп аталатын кинотуынды түсіріліп жатыр.

Тақырып: bnews.kz

«Қазақ елі» атты тарихи ірі кино жобасының премьерасы 2015 жылдың желтоқсан айында өтеді деп жоспарланып отыр. Бұл жайында Мәдениет және спорт министірлігі Мәдениет және өнер істері департаментінің директоры Ақтоты Райымқұлова мәлімдеді, деп хабарлайды BNews.kz.

«Елбасымыз ұсынып, халқымыз қолдаған «Мәңгілік ел» бағдарламасы мақсаттарының бірі, һәм бірегейі – ұлтымыздың рухани байлығын насихаттау. Бағдарламада ел тарихы мен мәдениеті тақырыбында ой қозғайтын ұлттық фильмдер кешені де қарастырылған. Үндеуге ие болған жолдаудың мақсатына сәйкес 10 сериялық «Қазақ елі» телехикаясы түсіріліп жатыр. Түсірілімнің басым бөлігі артта қалды. Қазір актерлік дыбыстау, 3D форматына көшіру, сюжеттің шығармашылық және техникалық жұмыстары жасалып жатыр»,- деді Райымқұлова.

Продюсер Арман Әсеновтың айтуынша, ұлттық киноэпостың түсірілім алаңында жұмыс қайнап жатыр. Аса айтарлықтай кедергі жоқ, тек ауа-райының жағдайына тәуелді болып тұрған тұстар бар.150 көріністің 70-і түсіріліп аяқталды.
Жоба 16 желтоқсанда жұмысын бітіреді деп жоспарлануда. 2016 жылдың қаңтар айында фильм барша қазақстандықтардың назарына ұсынылатын болады. Сондай-ақ, халықаралық көрсетілім бойынша келіссөздер жүргізіліп жатыр.

Тақырып:bnews.kz